Печено месо од дива свиња
Подготовката на дивото месо не е комплицирана, само бара малку повеќе зачини и подолг период на подготовка.
Подгответе:
- диво свинско месо(количина по желба)
- печурки шампињони (количина по желба)
- 200гр пушена сланина или 1 до 2 супени лажици свинска маст
- 2 до 3 главици кромид
- 1 главица лук
- оцет
- масло за јадење
- сол
- вегета
- црн бибер
- други зачини и мирудии по желба за подобрување на вкусот на месото (ловоров лист, нане, жалфија, рузмарин, рендан морков и др. според желба и вкус)
Дивото месо го наложуваме во подлабок сад, одвечер, да одстои неколку часа.
На секој ред посипуваме малку масло за јадење, малку алкохолен оцет, сол и зачини. Може да насецкаме свеж лук или да користиме лук во прав.
Наложеното месо добро го натиснуваме со прозирна фолија, ставаме поклопец на садот и го одложуваме во фрижидер до негово подготвување.
Утредента месото го префрлуваме во експрес лонец.
Налеваме вода колку да го преплива месото. Сецкаме стар или млад кромид, по желба, ги додаваме печурките и го затвараме лонецот.
Ставаме на оган да врие од 1 час до 1час и половина.
Во почетокот плотната ја вклучуваме на 3, а откако ќе зоврие водата во лонецот, температурата ја намалуваме.
Доколку не сте користеле експрес лонец, пожелно е пред да почнете да готвите во него да прочитате упатството за негова употреба.
Динстаното месо го префрлуваме во огноотпорен сад или во друг сад наменет за печење.
Ова месо не е мрсно и затоа одозгора сецкаме пушена сланина или додаваме свинска маст, малку масло за јадење и го запекуваме во рерна на 250 степени околу 20 минути, малку да се зарумени.
Доколку месото го користиме следниот ден, можеме да го наложиме во стаклена тегла и истата да ја пастеризираме во рерна, половина час, на 100 степени.
И дивото станува питомо кога ќе му посветиме време и внимание, пријатен апетит :)
niko650
